Deputat Musa Quliyev "Report”a açıqlamasında bildirib ki, Əli Əsədovun Baş Nazir vəzifəsinə təyin edilməsi doğru addımdır. Onun sözlərinə görə, Əli Əsədov cəmiyyətin çox yaxşı tanıdığı islahatçı kadrlardan biridir: "Əsədov uzun illər ulu öndər Heydər Əliyevlə çalışıb, Prezident İlham Əliyevin iqtisadi məsələlər üzrə köməkçisi olub. O, iqtisadiyyat sahəsində alimdir, yenilikçi bir insandır. Prezident İlham Əliyevin ortaya qoyduğu sürətli sosial-iqtisadi islahatlar kursuna uyğun olaraq, Nazirlər Kabineti də çevik reaksiyasını verməlidir. Prezident İlham Əliyevin tapşırıqlarını, tövsiyələrini çevik, operativ olaraq insanlara və dövlətə sərfəli olan şəkildə həll etməkdən ötrü Nazirlər Kabinetinin başında bu sahəni dərindən bilən, yenilikçi, sədaqətli bir şəxsin olması vacib idi. Ona görə də düşünürəm ki, Əli Əsədovun Baş Nazir vəzifəsinə təyin edilməsi uğurlu seçimdir. Prezidentin son dövrlər başlatdığı kadr islahatları da dövlətçiliyin möhkəmləndirilməsinə xidmət edir. Bu addımlar xalqın sosial rifahının yüksəldilməsinə yönələn addımlardır”.

Deputat Tahir Rzayev "Report”a açıqlamasında deyib ki, Prezident İlham Əliyev peşəkar, həyata keçirilən islahatlarda rol ala bilən kadrları irəli çəkir, etimad göstərir: "Həmin kadrlar da özlərini doğruldurlar. Əli Əsədov da peşəkar kadr kimi irəli çəkilib. Onun iqtisadi sahədə çox böyük səriştəsi var, uzun müddət Heydər Əliyev siyasi kursuna xidmət edib. Prezident onun qabiliyyətinə, bacarığına yaxından bələddir. Belə bir şəxsin Baş Nazir olması ölkənin gələcək inkişaf üçün çox vacibdir. Nazirlər Kabinetində uzun müddətdir ki, islahatlar həyata keçirilir. Hər kəsə aydındır ki, son bir ildə böyük islahatlar həyata keçirilib. Bunu nəinki Azərbaycan xalqı, beynəlxalq təşkilatlar, siyasətçilər yüksək qiymətləndirirlər. Bu, həyata keçirilən siyasətin uğurunu göstərir. Düşünürəm, islahatlar bundan sonra da müvəffəqiyyətlə davam edəcək”.

Xatırladaq ki, Prezident İlham Əliyevin sərəncamı ilə Əli Əsədov Baş Nazir təyin edilib.