“Quska” Emin Milliyə 50 min, Orduxan Teymurxana 22 min avro ayırıb? - ŞOK İDDİA

“Quska” Emin Milliyə 50 min, Orduxan Teymurxana 22 min avro ayırıb? - ŞOK İDDİA
Hazırda Avropa ölkələrində yaşayan və hakimiyyət əleyhinə kampaniyalar aparan bir qrup şəxslər – Emin Milli, Orduxan Teymurxan, Tural Sadıqlı, Məhəmməd Mirzəli, Rafael Piriyev, Həbib Müntəzir və digərlərini dəstəkləyən əsas qüvvənin kimliyi məlum olub.

Bu barədə Oxu.az məlumat yayıb. Avropada fəaliyyət göstərən diaspora dairələrindən əldə olunan məlumata görə, Almaniyada sığınacaq alan keçmiş deputat, "Quska” ləqəbli Hüseyn Abdullayev yuxarıda adları qeyd olunan şəxsləri bir araya gətirirək, onlara maliyyə vəsaiti ayıracağını vəd edib.

İddia olunur ki, Hüseyn Abdullayev verəcəyi pulun qarşılığında Emin Milli, Orduxan Teymurxan, Tural Sadiqli, Məhəmməd Mirzəli, Rafael Priyev, Həbib Müntəzir və digərlərindən Azərbaycan prezidenti, ayrı-ayrı yüksək vəzifəli şəxslər, onların ailə üzvləri, eyni zamanda dövlətimiz və xalqımız haqqında iyrənc şər-böhtan və qarayaxma kampaniyaları aparılmasını tələb edib.

Məlumatda bildirilir ki, "Quska” başladılacaq kampaniyalar üçün də həmin şəxslərin lazımı qədər vəsaitlə də təmin olunacağına söz verib.

"Hüseyn Abdullayev təxribatçılara xüsusi tapşırıq verib ki, ara-sıra Ermənistan səfirliyi qarşısında da kiçik aksiyalar keçirilsin və bununla Azərbaycan xalqının gözündə onların Ermənistana qarşı "düşmən” obrazı yaradılsın. Daha sonra "Quska” Azərbaycan dövlətinin atributlarına və ayrı-ayrı vəzifəli şəxslərə qarşı qarayaxma kampaniyası aparacaq qrupun başında Emin Milli ilə yanaşı Orduxan Teymurxanın dayanmasını istəyib.

Müzakirələrdən sonra adları çəkilən şəxslər Hüseyn Abdullayevin bu təkliflərini qəbul edərək, hərəkətə keçiblər.

Mənbənin məlumatına görə, artıq "Quska” ilkin olaraq Emin Milliyə 50 min, Orduxan Teymurxana isə 22 min avro vəsait ayırıb. O, həmçinin vəsaitin davamlı olacağını söz verib. 

Qeyd edək ki, Azərbaycan cəmiyyətində kriminal "Quska” obrazı yaratmış Hüseyn Abdullayev vaxtilə Azərbaycanda jurnalistlərə, vətəndaş cəmiyyətinin üzvlərinə saxladığı "qoçu dəstələri” ilə hücum çəkməyi ilə yadda qalıb.

2007-ci ildə Milli Məclisin iclası zamanı deputat həmkarına nalayiq söyüşlər söyən və sonra da ona hücum edən Hüseyn Abdullayevin deputat mandatı əlindən alınıb.

Bundan sonra isə Hüseyn Abdullayev müalicə almaq adı ilə Azərbaycanı tərk edərək Almaniyaya qaçıb"- deyə bildirilir.
 

Xəbər lenti