Bazarlarda müştəri çatışmazlığı

Bazarlarda müştəri çatışmazlığı
Bakı bazarlarında piştaxtaların sayı demək olar, hər gün azalır. Əhalinin alıcılıq qabiliyyəti aşağı olduğuna görə, satıcılara piştaxta kirayələmək sərfəli deyil. 

ANN.Az məsələ ilə bağlı paytaxtda fəaliyyət göstərən bir sıra bazarla əlaqə saxlayıb.
 
"Təzə Bazar” ASC-nin mühasibi bildirib ki, ahalinin alıcılıq qabiliyyətinin azaldıqca, satıcıların sayında azalma müşahidə edilir:

"Müştəri olmadığına görə, satıcılar da hər gün kirayə vermək istəmirlər. Buna görə də, satıcıların piştaxtaların sayı azdır”.

Oxşar hal "Nəsimi bazarı”nda da müşahidə edilir. Bazar satıcılarından biri ANN.az-a alıcılıq qabiliyyətinin aşağı olmasının səbəbini qiymət artımı ilə əlaqələndirib: 

"Alıcıların sayı günbəgün azalır. Əgər əvvəllər gün ərzində bazara minlərlə alıcı gəlirdisə, indi bu rəqəm təxminən, on dəfə azalıb. Bazarda satıcı alıcıdan çoxdur. Daimi müştərisi olan satıcılar al-ver edə bilir, digərləri isə demək olar ki, tamamilə satışı dayandırıblar".

Eyni vəziyyətlə Bakının "Montin bazarı” və digər bazarlarda da qarşılaşdıq.

"Suraxanı Bazarı” isə bağlanma təhlükəsi ilə üz-üzədir. Mətbuatda yayılan məlumatlara görə, "Suraxanı Bazar" ASC-nin səhmdarlarından biri Sabir Məmmədov bazarın  müflis olmasının elan edilməsilə əlaqədar Bakı İnzibati-İqtisadi Məhkəməsinə müraciət edib. Eyni zamanda, məlumatlarda 16 illik fəaliyyəti dövründə qurumun səhmdarlarına heç bir divident vermədiyi də qeyd olunub.

Suraxanı rayon İcra Hakimiyyətindən АNN.Az-a bildirilib ki, bazar hələ ki, fəaliyyətini davam etdirir.

Əhalinin gündəlik qidalara olan tələbatını ödəmək üçün Kənd Təsərrüfatı Nazirliyi paytaxtın bir neçə rayonunda yarmarkalar təşkil edir.

"Yarmarkalar hər həftənin şənbə və bazar günləri təşkil edilir. Dekabrın 24-dən dekabrın 31-dək Bakının 5 rayonunda, eləcə də, Sumqayıtda iki ərazidə belə yarmarkalar təşkil olunub. Yarmarkaların sayı ötən illə müqayisədə artırılıb", - deyə, ANN.Az-a açıqlamasında nazirliyin mətbuat xidmətinin rəhbəri Murtuzəli Hacıyev bildirib

Vüsal Əzizov

Xəbər lenti